«Некаторыя народныя дэпутаты былі супраць ухваленьня закону аб падвойным грамадзянстве, бо мяркуюць, што колішнія грамадзяне Расеі і Беларусі, якія маюць грамадзянства іншай краіны, напрыклад эўрапейскай, будуць спрабаваць атрымаць украінскі пашпарт. Аднак наша Служба бясьпекі сумленна працуе», — сказаў народны дэпутат Украіны, намесьнік старшыні камітэту Вярхоўнай Рады ў пытаньнях правоў чалавека Руслан Гарбенка ў інтэрвію агенцтву «Укрінформ».
Паводле яго, інфармацыя пра такіх асобаў будзе пільна вывучацца і правярацца.
«Калі асоба ня будзе мець нічога супольнага з краінай-агрэсаркай, а будзе жыць на тэрыторыі Ўкраіны неабходны час, здасьць іспыт з украінскай мовы, гісторыі Ўкраіны, веданьня Канстытуцыі, будзе мець праўкраінскую пазыцыю, тады зможа атрымаць грамадзянства», — удакладніў ён.
ГЛЯДЗІЦЕ ТАКСАМА: Ці ёсьць негалоснае распараджэньне не даваць замежнікам украінскае грамадзянства? Меркаваньні беларусаў УкраіныДэпутат дадаў, што мэханізм атрыманьня грамадзянства закон рэглямэнтуе асобна для грамадзян Беларусі і Расеі, якія трапілі пад палітычныя рэпрэсіі, а таксама якія ваююць у Іншаземным легіёне.
«Такія асобы ня могуць афіцыйна адмовіцца ад грамадзянства Расеі і Беларусі, бо ня могуць вярнуцца ў свае краіны, аформіць неабходныя дакумэнты для спыненьня грамадзянства. Таму мы надаем такім асобам права дэклярацыйнай адмовы. Згодна з законам, дэклярацыя адмовы ад замежнага грамадзянства — гэта дакумэнт, які пацьвярджае адмову іншаземца ад грамадзянства іншай краіны і прызнаньне сябе толькі грамадзянінам Украіны. У такім выпадку асоба павінна падаць афіцыйны зварот у нашы органы ўлады», — дадаў Руслан Гарбенка.
18 чэрвеня Вярхоўная Рада Ўкраіны ўхваліла зьмены ў Закон аб грамадзянстве, які дазваляе некаторым катэгорыям украінцаў і іншаземцам захаваць грамадзянства іншай краіны, не адмаўляючыся ад грамадзянства Ўкраіны.
ГЛЯДЗІЦЕ ТАКСАМА: Ва Ўкраіне дазволілі мець падвойнае грамадзянства. Што ад закону можна чакаць беларусам